Tema esploro
Efektive materialon por interkultura esploro oni povas trovi en preskaŭ ajna temo, ajna esplorkampo. Eĉ ene de tiom teknika temo, kiel "Energio" oni povas starigi "interkulturajn" demandojn: "Kiel la vivstilo kaj valoroj/principoj de popolo influas uzon de energio? Chu oni estas ŝparemaj pri energio? Kiel oni povas klarigi tiun (mal)ŝparemon? Kiel uzo de certa energifonto influas la medion kaj kiel homoj reagas al tiu influo? Chu dum lastaj 100 jaroj en via socio/medio oni ekis uzi novajn energifontojn? Kiel tio influis vivon kaj kutimojn de homoj? ktp".
Esplori kion pensas pri certa temo aŭ certa(j) demando(j) grupo de IK-lernantoj el alia lando povas esti efika metodo de interkultura lernado kaj en si mem interesa interkultura sperto.
Kiel jam estis dirita supre, ne ekzistas pretaj temoj por interkultura esploro. Ajna temo povas taŭgi, se ĝi estas interesa al lernantoj kaj se partoprenantoj kune kun gvidanto sukcesos trovi en ghi interkulturajn aspektojn.
Por realigo de interrupa pritema esplorado, ni proponas al vi jenan skemon::
- Elekto de temo
- Serĉado de kunlaboronta grupo kaj interkonsento pri la temo.
- Disdivido de taskoj ene de grupo.
- Preparado de detala plano kaj interkonsento pri daŭro de ĉiu laborpaŝo.
- Kolekto kaj sendo de materialo al la alia grupo.
- Ricevo kaj analizo de ricevita materialo.
- Respondo al demandoj kaj petoj de la alia grupo kaj reciproka sendo de demandoj kaj petoj por klarigo ktp.
- (Ripeti laŭbezone ekde la paŝo 5).
- Redaktado de rezultoj kaj pretigo de prezento/raporto pri esploro.
- Aperigo de raporto/prezento sur retpaĝoj de Interkulturo.
- (Opcia) Kreado kaj realigo de kvizo pri la esplorita temo.
Laborante per tiu ĉi metodo, gvidanto devas memori pri kelkaj gravaj momentoj en organizado de laboro:
- Taŭgeco de la temo : Estas lernantoj, kiuj elektas la temon, ne gvidanto. La temo devas esti interesa por partoprenantoj kaj esti taŭga el vidpunkto de aĝo de partoprenantoj. Evitu preni tro ampleksan temon – memoru, ke vi havas limigitan tempon por fari la esploron. Prefere oni trovu profundan respondon al unu eta demando, ol malprofunde esploru vastan temon. Atentu ankaŭ pri preteco de lernantoj esplori koncernan temon. Kontrolu kiujn bazajn antaŭsciojn, konojn kaj esplormetodojn (serĉado de informo en literarturaj fontoj, enketado, intervjuado ktp) oni bezonas por efike realigi la esploron kaj certiĝu ke viaj partoprenantoj havas ilin.
- Konduto de gvidanto : Memoru, ke vi estas nur unu el partoprenantoj de la tuta proceso. Ĉiam pretu lerni mem kaj lasu al partoprenantoj eblecon labori memstare. Nur en tiu kazo oni akiros spertojn de IK-lernado. Estu helpema, se tio bezonatas, sed neniam altrudu vian helpon kaj ne provu stiri la laboron en la direkton, kiu ŝajnas plej taŭga al vi.
- Resursoj : Kontrolu kiujn resursojn kaj materialojn vi bezonas por esplori la temon kaj fari postan raporton kaj certiĝu, ke vi havos ilin.
- Starigo de celoj kaj planado : Ĉiam havu klaran celon de esplorado kaj atentu pri limdatoj en kunlaboro.
Informoj kaj listo de aktualaj esplortemoj.
